Sparebankstiftinga Søre Sunnmøre forvaltar formue opparbeida gjennom 170 års bankdrift

Historiske røtter

Sparebankstiftinga Søre Sunnmøre forvaltar formue opparbeida gjennom 170 års bankdrift på Søre Sunnmøre gjennom Volda og Ørsta Sparebank.



Fyrste og andre påskedag i 1853 lyste dei frå kyrkjebakkane i Volda og i Ørsta at dei skulle skipa sparebank i prestegjeldet. Då året var ute, kunne dei lysa for kyrkjelyden at Volda prestegjelds sparebank skulle take til med verksemda si i stovelåna til Rasmus Jonson Halkjelsvik. 
Opningsdagen vart 2. januar 1854 for Voldens og Ørstens Sognes Sparebank.



Med oppstart av sparebanken hadde bygdene teke eit steg bort frå det gamle samfunnet mot eit anna; folket hadde nye tankar, fekk nye hjelperåder og nye levevis. Ein gjekk frå det gamle bondesamfunnet til eit nytt samfunn der industrien har fått rom. 

Sparebanken har vore eit hjul mellom hine som driv fram dette nye samfunnet. Samstundes har dei hine hjula i samfunnsmaskinen vore med på å drive fram hjulet som heiter Volda og Ørsta Sparebank, seinare Sparebanken Volda Ørsta, SpareBank1 Søre Sunnmøre.


Då banken vart skipa viste ein til at overskotet skulle gå til allmennyttige formål. Dei første hundre åra var dei prioriterte områda for tildeling av gåver jord- og skogbruk, samferdsel, helse- og sosialvesen, skule og kultur. I nyare tid har det vore mykje gåver til idrett, kultur og anlegg.


Bank er på mange måtar eit spegelbilete av samfunnet ein arbeider i. Bank er dynamiske organisasjonar som heile tida må tilpasse seg næringslivet og innbyggarane i det område ein tener. Greier ein ikkje å omstille seg, vil ein stagnere.


Historie

Volda vart etablert som Volda formannskapsdistrikt i 1837. Volda og Ørsta var då ei felles kommune.  I 1883 vart Ørsta skilt ut og etablert som eiga kommune. Frå 1935 hadde banken eige kontor i Ørsta. 
Banken og samfunnet her har hatt ei rivande utvikling. 

I 2006 opna banken kontor i Ulsteinvik og i 2008 kontor i Herøy. 

Visjonen til banken, «

vi skal være ei drivkraft for å gjere det betre å bu og virke på Søre Sunnmøre»

, har banken vore ein viktig støttespelar for næringsliv, personkundar og lokalsamfunnet på Søre Sunnmøre. 

I generalforsamlinga i SpareBank1 Søre Sunnmøre 9. november 2022, vedtok ein at banken vart slått saman med SpareBank1 SMN. Det vart vidare vedteke at SpareBank1 Søre Sunnmøre skulle skipe ei stifting som gjennom disposisjonar først og fremst skal ta omsyn til det distriktet som har bygd opp kapitalen til tidlegare SpareBank1 Søre Sunnmøre.

Formålet med stiftinga skal vere:
-Sikre at sparebanktradisjonar vert vidareført på Søre Sunnmøre.
-Vise stort engasjement, og bidra positivt i lokalsamfunnet gjennom å gje bidrag til allmennyttige formål.
-Vere ein langsiktig eigar i SpareBank1 SMN.
-Utøve forsvarleg forvaltning av dei midlane som stiftinga eig.